今日睇报纸，见到香港要重拍《狮子山下》呢出反映香港民生嘅电视剧，重话由罗文主唱嘅同名主题曲《狮子山下》几乎已经成为咗香港嘅主题曲，今次嘅主题曲将利用一啲技术，将《狮子山下》中罗文嘅声音分离出嚟，造成好似容祖儿同佢合唱一样。
报纸重介绍咗剧嘅一啲情况，陈亦迅扮演垃圾佬，一日与垃圾为伍，反映香港社会底层嘅生活情况；重有曾志伟等等名艺人嘅加盟演出……由于经费不足，艺人一般都系攞啲交通补贴，而冇真正嘅收入，但系都冇减少到各艺人演出嘅落力……
睇睇下呢篇报道，联想起广州本地嘅剧集，诸如《外来媳妇本地郎》、《开心廿四味》、《山水友相逢》等等……虽然都可以反映到广州嘅特色生活，但系点解睇落总係觉得缺少咗啲嘢咁呢？后来发现，呢啲本地剧集虽然可以反应广州部分生活情况，都可以话係贴近生活，但系编剧就系太过抓住广州人“市井”呢点嚟做文章，故事多数都係反映啲人物点样勾心斗角、缩骨姑寒、贪小便宜等……缺少嘅，係一啲可以真正打动广州人，勾起广州人心底嗰份热情，激起广州人团结一致、搞好广州嘅上进心嘅一啲元素……
无法触碰观众心灵嘅电视剧，只有茶余饭后消遣呢一个功能。我谂呢个都系我唔中意睇，同埋无法吸引啲广州新人类嘅原因之一啩！
反观日剧，有人话佢懂得“煽情”，经常将一点无限放大，赚取观众一勺眼泪……我唔认为咁样嘅“煽情”有咩唔好，有眼泪流落嚟，证明佢已经进入观众内心，引起深层次嘅共鸣。
如果本地剧集可以渐渐进入广州人内心深层少少嘅地方，轻轻打动每一个广州人，无论系老广州抑或广州新人类。咁呢出剧，就系成功嘅剧集！