寻晚太过夜瞓，今朝点都起唔到，9点先起身，快速搞掂啲嘢，9点半出门，10点多啲啲到精典大厦，点知见到people moutain people sea！原来今日有招聘会，同埋临近到期，好多人来报到，重要周末得开一个窗口值班。死死地气排队，好唔容易排到我，点知原来要填份协议，填完番嚟，谂住直接递过去，点知后面啲人以为我兼队，遭受n人白眼真系惨，唔想再排队，唯有忍辱负重！递完协议，又要去交钱，点知个财务唔喺度，要落六楼揾财务，个财务又话冇发票又剩，吓得我出一身冷汗！如果听日再要嚟一次，真系……好在发票喺度，佢哋都算交班交得有手尾！搞到成11点先搞掂报到啲嘢！二百四，食咗我只车啦！不过都好过班长挂南方人才市场要一年五百……-_-；
飞地铁去到长寿路同玫汇合，开始一日漫长嘅逛街，从恒宝逛到上下九，午餐喺多宝路嘅kfc搞掂，嘿嘿，赶上咗优惠鸡块优惠券嘅末班车，好彩好彩。可惜嗰边啲鸡块唔够大，味道又唔够，睇嚟偷工减料啦！经过阿依×，搞紧特价，啲人好似唔驶钱咁，一堆人喺度拣，逼咗入去，点知都淘到几件，啊啊啊，又二百冇咗啦！！早知就唔攞咁多钱出来啦！不过几件都几满意嘅，嘿嘿，趁机转下形象都好。
陪玫去买猫粮，点知喺清平市场遇上cats & dogs（哈哈，果然係清平市场）！我哋差啲变成落汤鸡，唯有暂时离开，好彩场雨落咗唔系好耐。同6只鸡&细佬汇合，天气已经变得几好啦（但系落完雨地面啲水蒸上来，搞到好唔舒服，唉），一行人去买咗猫粮，清平市场真系好多宠物卖，顺便问咗下仓鼠嘅价钱，嗯可以考虑。顺便一提：啲狗狗好鬼可爱啊！可惜我冇咩心机养～～
陪细佬买咗条裤之后，水埋玫一齐去6只鸡餐厅度坐！哇哈哈哈，3个人坐咗几耐下，晚餐又喺kfc解决，瀑布汗！！有熟人买嘢，啲嘢分量果然够足，咔咔咔～～
玫提议去撞人坊睇下，于是我哋两个先行，6只鸡善后之后跟上。由于我夜晚重有工作，啱入撞人坊，就出去了，玫苦揾唔到柜员机，将我成张民生掠夺咗。呵呵，佢咁惨，唯有俾佢掠夺啦。同玫分手后，去望住6只鸡食饭，一边呻下啲唔愉快嘅事，哈哈哈哈哈……
食完饭，行出去继续倾关于工作嘅嘢，一直到东风路M记先分手。呻完一轮真系舒畅！呵呵～～
8点，同广医班人倾活动啲嘢，班人确实唔错，氛围、阿头、思维都几好，好过上次嗰班人……-_-；
番嚟路上为咗13文而奋斗，全程喺度打电话～哈哈哈～～
9点半，结束愉快嘅旅程，番到屋企～～